NATULDOKAN og kapildihan batok sa Qatar, 61-66, ang tahas sa Smart RP Gilas sa elimination round sa 3rd FIBA Stankovic Cup kagahapon sa Beirut, Lebanon.

Ang mga Pinoy ninghuman sa elimination round bitbit ang 2-2 nga rekord sa Group B. Hinuon aduna pa’y poruhan ang mga Pinoy alang sa titulo apan lisod na gyud kaayo nga tahas ang ilang sagubangon kay ang sunod nilang ikaharong mao na ang gikan sa Group A.

Sayo kaayong miratsada ang opensa sa Qatar ug ilaha dayon nalubong ang mga Pinoy, 21-6, human sa first quarter.

Sa pagpangulo nila ni Chris Tiu, Marcio Lassiter ug Asi Taulava, ang mga Pinoy hinayhinay nga ningkamang hangtod nga nakaduol gyu sila pagbalik sa 4th quarter.

Apan wala gyud nakalahutay ang mga Pinoy kay nahikawan na sab sila sa oras.

Sa kasamtangan, ang Qatar nag-una sa Group B dala ang 3-0 nga baraha ug ilang gikauban sa puwesto ang Lebanon.