USA ka lalaki nga naghupot og marijuana nasikop sa mga barangay tanod sa lungsod sa Magsaysay, Davao del Sur, alas 10 sa buntag, Lunes.

Si PO2 Jerome Quaipo, imbestigador sa Magsaysay police, nag-ila sa dinakpan nga mao si Florante Abella, taga Purok 6, Barangay Maibo sa maong lugar.

Sumala ni Quaipo nga nasikop ang suspek nila ni barangay tanod Antonio Tapican, Nestor Pulacan, Berto Panday ug Ernesto Cawile.

Ang suspek gidala sa bay sa barangay kapitan aron susihon ang sud sa gibitbit niining belt bag.

Apan nahibung ang mga tanod sa dihang nasiplatan nga nagdali ang suspek pagkuot sa usa ka papel nga didto sa bulsa sa bag.

Daling gihiling sa mga tanod ang giputos nga butang ug ilang nasuta nga mga pinaugang dahon sa gituohang marijuana ang sud sa papel.

Tungod niini, gidakop sa mga tanod ang suspek ug gitunol ngadto sa kapulisan lakip na ang nakumpiskang marijuana aron ipa-eksamin.

Kagahapon sa buntag, pormal nga giduso sa kapulisan ang kasong paglapas sa Republic Act 9165 kun labawng nailhan nga Violation of Dangerous Drugs Act of 2002.

Anaa na sa selda sa kapulisan nagtingkagol ang suspek. (Dondon Dinoy)