NIMARTSA ang Kagay-anong si Francis Casey Alcantara sa ika-duha nga round atol sa F3 Singapore Futures singles tournament niadtong Martes, Hunyo 6, sa Singapore.

Kini, human gipilde sa 25-anyos nga Alcantara ang Katsila nga si Bruno Mardones agi sa iskor 6-3 ug 6-4 sa unang round.

Maatbang ni Alcantara ang modaug tali sa seed number 2 nga si Dayne Kelly sa Australia ug Benjamin Hannestad sa Denmark, diin nagdula Miyerkules sa ning pagsulat.

Sa pikas bahin, sulayan nila Alcantara ug sa iyang Dutch partner nga si Sem Verbeek nga masegundaan og usa pa ka titulo aron makompleto og grandslam gikan pagdaug nila sa F1 ug F2 Futures doubles tournament sa Singapore.

Sa ilang panag-uban, gipalinya nila og harus ang mga Hapon nga niharang sa ilang mga agi.