SA labing unang higayon karong tuiga, usa ka nagpadayon nga konstruksyon ang gipahunong sa Department of Labor and Employment (DOLE) 7 human nakalapas sa kaluwasan sa kawani nga nagtrabaho niini.

Ang konstruksyon sa KTM Cebu Showroom Building sa North Reclamation Area sa syudad sa Mandaue gipahunong sa maong ahensiya human nakalapas sa Occupatio­nal Safety and Health Standards (OSHS) atol sa pagbisita sa labor laws compliance officer sa Dole 7 sa milabay nga semana.

Matod ni DOLE 7 Regional Director Exequiel Sarcauga nga adunay mga trabahante nga nakit-an nga nagtrabaho sa taas nga bahin nga wa magsul-ob og full body harness diin tataw nga risgo sa kinabuhi sa mga trabahante.

Matod niya nga nipadala gilayon siya og labor laws compliance of­fi­cers alang sa dugang pakisusi.

Ilang napalgan ang dugang mga kakuwangan sa kaluwasan sa mga trabahante.

“The construction proceeded despite the company’s failure to follow certain mandatory OSHS requirements,” matod nya.

Nasuta nga pakyas sa pagpresentar ang kom­paniya sa Philippine Con­tractors Accreditation Board (PCAB) license lakip na usab ang Dole approved Construction Safety and Health Program (CSHP).

Gawas sa wa pagsul-ob og personal protective equipment (PPE) sama hard hat ug face shield, daghan usab nga mga trabahante ang nakit-an nga nagsul-ob og tsinelas sa trabahoan ingon man sapatos.

Aron kalikayan nga motumaw ang mga aksidente gumikan kay wa motuman sa angay buhaton gipahunong ang pagtrabaho sa maong showroom.

Matod ni Sarcauga nga mamahimo lang mapadayon sa kompaniya ang pagpatrabaho kana kon matuman na nila ang ilang mga kalapa­san.