GIDUDAHANG kawatan ang napalgang patay na sayo kagahapon sa buntag sa North Road 6, North Reclamation Area, Barangay Carreta, dakbayan sa Sugbo.

Ang biktima nailhan lang sa alyas nga “Bolantoy”, 16, ug nagpuyo sa maong barangay.

Ang biktima unang nadiskubrehan ni Juanito Tojeno, security guard sa usa ka edipisyo sa maong lugar.

Matod ni Tojeno, samtang nagpatrolya sayo sa buntag, iyang nakita nga diha na sa yuta ang biktima, kilid sa usa ka taas nga koral sa edipisyo nga iyang gibantayan.

Daling gitawagan ang kapulisan sa Mabolo, pipila ka metros lang ang gilay-on gikan sa nahitaboan.

Atol sa paghiling sa lawas sa biktima, nakita nga wa kiniy samad o bun-og sa iyang lawas, gawas lang sa dugo nga niagas sa iyang pulso.

Matod ni PO1 Lou Pagara sa Homicide Section nga ila pang ipa-autopsy ang patay nga lawas sa biktima aron sa pagtino kon unsay iyang namatyan.

Giangkon usab sa kapolisan nga nakawat na sila og taho nga gipangkawatan na ang mga edepisyo sa maong lugar ug ilang giila ang biktima nga usa sa mga gidudahan.