MITUBO og 22.58 porsyento ang income sa 16 ka mga provincial ug district hospitals nga gidumala sa ka­gamhanan sa lalawigan sa Sugbo.

Sa 2017, mas dako og P54,125,367 ang kinitaan sa maong mga hospital kon itandi sa 2016.

Si Dr. Rene Catan, pangu sa Provincial Health Office, namahayag nga ang ilang gibuhat mao ang pagtapak sa buslot sa sistema diin nagbutang sila og mga tawo nga maoy mokupot sa Philippine Health Insurance Corp., hinungdan nga nagkadako ang income sa mga tambalanan kon itandi sa nangaging katuigan.

“Sa 2017, what we did, we’ve identified those mga holes. Nagbutang ta’g mga tawo, trained them hinayhinay, karon ang kwarta nibalik, so overnight ang atoang kita nidako,” pasabot ni Catan.

Sa record nga gihatag ni Provincial Treasurer Emmanuel Guial sa Superbalita Cebu, nasayran nga niabot og P293,796,480.65 ang income sa 16 ka mga provincial ug district hospitals gikan sa Enero hangtod sa Disyembre 2017.

Samtang, P239,671,113.68 ang kinita sa mga ospital sa susamang panahon sa 2016.

Ang Carcar Provincial Hospital ang dunay kinadak-an og income nga nikabat og P59,210,721.94. Nitubo kini og 20.91 porsyento itandi sa 2016.

Si Catan namahayag nga tungod kay mas nilambo ang mga serbisyo sa mga provincial ug district hospitals, nidaghan ang mga pasyente.

Sila padayon nga manawat og espesyalista nga mga doktor sama sa anesthesiologist, obstetrician, internist ug pedia­trician ingon man mga nars.

Siya nipasabot nga pinaagi sa espesyalista nga mga doktor mag-level up ang mga ospital diin usa sa mga reki­sitos kinahanglan dunay mga doktor nga makaopera aron mahimong level 1.