NAMATAY ang usa ka lalake kinsa nakigsumbagay sa iyang kainom human giatake sa sakit sa kasingkasing.

Ang namatay mao si Roland Taclisan, 45, minyo ug mananagat.

Sumala pa nga nakigsumbay si Taclisan sa iyang kainom nga si Jonathan Malig, 29, ulitawo, niadtong Dominggo, alas 2 sa hapon sa Purok 1, Sitio Kalsada, Barangay Cogon, Talicud, Kaputian District, Island Garden of Samal.

Nasayran nga ang biktima ug suspek nag-inom sa balay sa ilang higala nga si Tito Maurillo.

Apan sumala pa, nga kalit lang nga nagkalalis ang duruha sa wala masayri nga hinungdan.

Tungod kay ang duruha pulos hubog na, unang gisipa sa biktima ang suspek sa makaduhang higayon tumong sa nawong niini.

Ug dihang nahagba na, gituok pa kini sa biktima.

Apan misukol ang suspek ug naningkamot nga makatindog busa nahitabo ang sinumbagay sa duruha.

Nakabalos ang suspek ug nasumbagan sa makadaghang higayon ang nawong ug ulo sa biktima hinungdan sa pagkatumba niini ug nawad-an og panimuot.

Daling gidala ang biktima ngadto sa Samal Emergency Hospital apan nakabsan siya sa kinabuhi.

Sumala pa nga cardio pulmonary arrest ug head injury ang hinungdan sa kamatayon sa biktima, sumala pa ni Doctora Ethel Quipanes.

Samtang nadakpan sab dayon ang suspek ug gibalhog sa prisohan. (DRP)