NAGPLANO ang Cebu Provincial Board nga mopahigayon og imbestigasyon kabahin sa nahitabong disgrasya sa usa ka tourist van niadtong Sabado sa hapon didto sa lungsod sa Alegria. Usa ka tourist van nga gipanag-iya ug gimaniho mismo ni Gilbert Dela Cruz, 44, taga Guiwanon, Argao mibangga sa usa ka dakong punoan sa Mahogany nga miresulta sa kamatayon sa pito ka mga tawo ug miangol og tulo.

Ang mga biktima mga Filipino apan atoa na magbase sa Estados Unidos mobisita unta didto sa Badian aron magsuroy-suroy. Adunay doctors ug nurses nga gikatakda unta nga mag-medical mission sa Camiguin pagkasunod adlaw. Ang tulo nga naangol anaa pa sa Chong Hua Hospital. Miangkon si Dela Cruz nga nakatagpilaw siya samtang nagmaniho gumikan kay wala siyay pahuway kay straight upat ka adlaw na siyang nagmaniho.

Unsa may tumong sa PB pag-imbestigar sa maong hitabo nga aksidente man to? Ang mga legislative body sama sa Kongreso ug mga konseho mopahigayon og imbestigasyon aron makapanday og maka-umol sila og balaodnon nunot sa usa ka isyo. Kanang giingon nga “in aid of legislation.” Unsa man mopasar sila og balaodnon nga mag-regulate o magdili aning mga tourist van nga mga kulurom nga maka-operate?

Dili naman siguro kinahanglan ang balaod nga lokal niana gumikan kay naa na may mga ahensiya sa gobiyerno nga molutos ug mogukod sa mga kolurum nga mga sakyanan. Naa ang Land Transportation Office (LTO) ug Land Transportation Franchising and Regulatory Board (LTFRB). Trabaho ning duha ka agensiya ang pagdakop aning klaseng mga sakyanan. Ang angayan himoon sa PB nga mosuwat sa LTO ug LTFRB nga hingusgan ang pagpanakop aning mga kolurum.

Unsa man mopasar pod sila og balaod nga idili na pagtanom og mahogany sa daplin sa dalan? Kon wala pa tong punuan sa mahogany dili unta mangamatay ang mga pasahero? Nag-usik-usik lang sa ilang panahon ang mga sakop sa provincial board kon ila kining ihinayon ang imbestigasyon.

(bobbygnalzaro@gmail.com)