DALING mi-rescue ang paramedics team sa Central 911 human gisabyagan og init nga kape ang nawong sa usa ka babaye tungod nasakpan kining gikauban niya ang uyab sa laing babaye.

Gi-ila nga ang biktima si Liezel (bansagon gitago), 25.

Ang insidente natigayon ala 1:00 Sabado sa kaadlawon sa usa ka balay kalingawan ning Dakbayan sa Davao.

Subay sa blotter nga natala sa Sta. Ana Police Station nasayran nga naaktuhan ni alyas Shiela, 23, sila Liezel ug ang iyang uyab nga si alyas Spencer, 19, nga nagtupad ug nagtagay og ilimnong makahubog.

Gi-ingong wala na kapugong si Shiela nga moduol dihang iyang nakita nga nagginunitay na silang duha sa ilang kamot ug sweet kaayo nga tan-awon.

Mi-order dayun siya ug kape kinsa naghangyo nga kanang bag-o pa nga gipabukal nga tubig.

Dihang gisilbi na kaniya ang kape, miduol kini sa duha ug gisabwag niya ang kape sa nawong ni Liezel maong nakaangkon og mga paso sa walang mata ug aping.

Human sa insidente, naabot ang mobile patrol sa Sta. Ana Police ug gidala ang suspek sa presinto.

Ang biktima kinsa pursigidong mopasaka og reklamo sa korte.