GIHAWOD ni Alan Neri ang 2017 Young Men’s Christian Association and BBC Sports Table Tennis Mindanao Open Class A singles Tournament niadtong Dominggo, Mayo 14, didto sa Barangay 6 plaza.

Naangkon ni Neri ang kampyonato human gipilde niya ang beteranong si Dario Hernane agi sa hingpit nga mga sets atol sa finals.

Nisinati og kalisod si Neri kontra kang Hernane sa sinugdanan human wala niya mahawira og ayo ang unang set.

Ika-duha sila nag-abot og "add-two," apan taas kaayo ang lahotay ni Hernane aron angkonon ang unang set sa iskor 13-11.

Niadyas si Neri sa istilo ni Hernane apan dili sayon alang kang Neri sa sunod nga mga sets.

Gitaparan lang niya ang lahotay ni Hernane hinungdan sa iyang pagdaug sa ika-duha ug ikatulo nga sets nga parehas og iskor sa 11-8 ug 11-8.

Didto dayon nabuak ni Neri og ayo si Hernane human gituldokan niya ang titulo agi sa 11-6 nga daug sa ika-upat nga set.

“Gahi kaayo si pare Dario. Lahotay lang ko nakalingkawas kaniya,” ingon ni Neri sa iyang kadaogan.

Nilanding lang si Hernane sa ikaduha nga pwesto, samtang nagsalo sila King Lara ug Jeffrey Faciolan sa ika-tulo nga pwesto.

Sa class B singles, naangkon ni Kyle Lanzaderas ang unang pwesto, samtang nagsunod si Leslie Cambongga sa ika-duha nga pwesto.

Sila Andrei Yucada ug King Lara niangkon sa ika-tulo nga pwesto.

Nihatag sab og kabibo ang mga kadalaing team events.

Giangkon nila Donic Patalinghug, Khalid Pandi ug Yulex Uy ang kampyonato sa class B team event, samtang nilanding lang sa ika-duha nga pwesto ang all-female nga panag-uban nila Antonette Neri, Leslie Cambongga ug Nicole Baltar.

Sila Jeffrey Pulta, J-boy Pulta ug Janna Mae Paculba naa sa ika-tulo nga pwesto.

Sa class C team event, nikampyon sila James Madelo, Nelle Pulta ug Bogs Baldevia, samtang nagsunod sila Robert Chong, Kim Madelo ug Walid Pandi.

Sa ika-tulo mao sila Raña, James Bruas ug John Gabaca.

Uban singles nga dula, naangkon ni Paculba ang 18-under open, samtang si Baltar naa sa ika-duha nga pwesto.

Nagsalo sila Cambongga ug Bianca Gallardo sa ika-tulo nga pwesto.

Nikampyon si Bethel Sadora sa 10-under, samtang sila Shane Baldevia ug Jamaica Escober nahulog sa ika-duha ug ika-tulo nga pwesto, sunod-sunod.