PORMAL nang gi-award sa Tuanson Construction ang kontraktor nga maoy nakadaug sa bidding alang sa pagtrabaho sa phase-2 sa bag-ong Tabunok Public Market, dakbayan sa Talisay.
Ang maong kontraktor mao usab ang nagtrabaho sa Phase-1 sa maong merkado sa kantidad nga P50 milyones nga gikatakda nang mahuman karong Abril 8.
Niadtong Marso 8 ang Bids and Award Committee (BAC) mipahigayon og bidding sa Phase-2 alang sa laing building ug Phase-3 nga seawage treatment facility nga ang tanan mokantidad og P113 milyones.
Sa upat ka mga misalmot, ang Tuanson maoy migawas nga labing ubos alang sa Phase-2 nga kapin P97 milyones pesos.
Samtang sa Phase-3 ang labing ubos mao ang kontraktor nga nakabase sa Manila nga mi-bid lang og kapin P11 milyones.
Si BAC Chairman Edgar Mabunay ug mao usab ang budget officer, nibutyag nga mi-qualify ang Tuanson tungod kay aduna na kini kasinatian sa maong proyekto ug dili na usab kini maglisod tungod kay sila man ang nagtrabaho sa Phase-1.
Kagahapon, ang mga sakop sa BAC milarga paingon sa kaulohan aron pagsusi sa mga proyekto sa IM Bongar Co. Inc. nga maoy nakadaug sa Phase-3 alang sa STF.
Nagkanayon si Mabunay nga kon ilang makita nga maayo ang trabaho ug kompleto silag mga dukomento hayan nga ila na usab unya kining i-award ngadto sa maong kontraktor.
Ang Tuanson maoy ika-duhang labing ubos og tanyag sa pag-bid sa phase-3 sa kantidad nga 12 milyones ka pesos.