SIYAM ka mga construction worker ang nangaangol human natumpag ang gitukod nilang pader alang sa usa ka hardware sa Brgy. Cotcot, lungsod sa Liloan kagahapon sa hapon.

Atol ning pagsuwat, padayon pang gitino sa kapulisan ang mga hinungdan sa pagkahugno.

Matod ni SPO2 Almer Maglinte sa Liloan Police Station sa Superbalita Cebu nga base sa ilang pasiuna nga kasayuran, sa siyam ka mga tawo nga nangaangol, anaay tulo ngadto sa lima ka mga kawani nga anaa sa kritikal nga kondisyon.

Mga biktima giilang sila si Lowel Batican, Bongo Coba, Alex Rosal, Lazaro Capa, Jr., Joel Procurato, Melvin Procurato, Rene Barrido, Condito Baculao, ug Antonio Cuenza.

Sila kasamtangang nagpaalim sa Mendero Medical Center sa lungsod sa Consolacion.

Sumala pa ni Maglinte nga kini nahitabo mga alas 2:10 sa hapon.

Giingong nagtrabaho ang mga kawani sa pader sa Citi Hardware sa dihang kalit kini nga nahugno.

Sigun ni Maglinte nga ang posibleng hinungdan sa pagkahugno mao ang pagpunay og uwan nga maoy hinungdan nga wa makauga ang pondasyon sa nagpadayon nga konstruksyon.