MALITA, Davao Occidental - Gibantayan sa mga sakop sa Provincial Disaster Risk Reduction and Management Council (PDRRMC) ang lima ka mga kalungsuran ning probinsya bisan di pa hingpit nahimong bagyo ang gibantayang low pressure area sa Mindanao.

Sumala sa severe weather bulletin number one sa Philippine Atmospheric Geophysical and Astronomical Services Administration (Pagasa), ang local name niini mao si Auring.

Uwahing nasiplatan ang sentro sa bagyo sa gilay-ong 185 kilometros sidlakang habagatang bahin sa Hinatuan, Surigao del Sur.

Dala niini ang gikusgon sa hangin nga 55 kilometros matag oras ug kapaspas nga 70 kilometro matag oras.

Direksyon sa daot nga panahon ang pakasadpan habagatang kasadpan sa gikusgon nga pito ka kilometros matag oras.

Giabisohan sab ni Harry Camoro, PDRRMC action officer sa probinsya, ang mga molupyo nga mag-amping sa mga pagdahili sa yuta ug mga posibleng pagbaha sa kasapaan nunot sa way puas nga pag-uwan.

Na-monitor sa PDRRMC ang mga pagdahili sa yuta sa pipila ka parte sa lungsod sa Jose Abad Santos tungod sa mga pag-uwan.

Bisan ang lungsod sa Sarangani, gibantayan sa posibleng pagtaas sa bawod sa dagat.

Gipahimagnoan sab ang mga mananagat nga dili una mopalawod samtang daot ang panahon tungod sa taas nga tubig sa dagat.

Hinuon, wala mahilakip sa signal advisory ang lalawigan ug silingang Davao del Sur apan apil kining nakasinati sa hinay apan walay puas nga pag-uwan.

Sa uwahing weather advisory sa Pagasa, gipailawom sa Signal Number 1 ang mga dapit sa Agusan del Sur, Agusan del Norte, Surigao del Sur, Surigao del Norte, Dinagat Island, Misamis Oriental, Camiguin, Davao del Norte ug Compostela Valley.

Gilaumang mogawas sa Philippine area of responsibility si bagyong Auring karong Huwebes, Enero 12.