SIKOP ang usa ka babaye kinsa nangilkil og kuwarta nga mokantidad og P10 mil bugti nga di siya mobulgar nga dunay kabit ang iyang gikilkilan nga usa ka call center agent.

Alas 11 sa buntag niadtong Martes, gilusad sa intel operatives sa San Pedro Police Station ang usa ka entrapment operation batok sa usa ka Charlene Ramiro, 21, dalaga, ug residente sa Peñaplata District, Island Garden City of Samal.

Una niini nagpatabang sa kapulisan ang usa ka Carla, 23, dunay kaipon, call center agent, kay gipangayoan siya'g P10 mil sa suspek.

Giingong kanhi uyab ang suspek sa kasamtangan nga kaipon sa nagreklamo, apan padayon kining nagsamok-samok pinaagi sa pag-iskandalo sa text sa cellphone ug bisan sa Facebook.

Dugang nasayran nga nanghadlok pa ang suspek ngadto sa biktima nga iyang ibulgar nga kabit lamang sa biktima ang kaipon karon.

Pinaagi sa ilang pagtext-sanay gusto sa suspek nga magpabayad og P10 mil aron di na siya magsamok-samok sa ilang relasyon hinungdan nga gikasa na sa kapulisan ang entrapment operation sa usa ka coffee shop sa dalang Bajada ning siyudad.

Gilayong giposasan ang suspek dihang iyang gidawat ang kuwarta nga mokantidad og P10 mil gikan sa biktima.

Sa kasamtangan, balhog na ang suspek sa prisohan ug pasakaan og kaso didto sa korte.