GITUN-AN na karon sa duha ka mga service contractors kon posible bang makabutang og wind turbine power plant sa Sugbo.

Kon kini posible, gawas nga kini ang labing una sa Central Visayas, posible usab kini nga usa ka tourist attraction.

Gibutyag sa tigpamaba sa Department of Energy (DOE) - Visayas nga si Lourdes Arciaga nga na-award na sa duha ka kompaniya ang duha ka service contracts.

Nakuha sa Amihan Energy Corporation and Cebu City Wind Power Project diin tukuron kini sa kabukiran sa Balamban, Toledo, Minglanilla ug Cebu City.

Samtang ang Ryanyx Construction & General Services Corp. usab ang na-awardan sa Cebu Wind Power Project nga giplanohang tukoron sa Argao, Dalaguete, Alcoy, Boljoon ug Oslob.

Susama sa Bangui Wind Farm sa Ilocos Norte nga gawas sa naghatag kini og supply sa kuryente, usa usab kini sa gibisita sa turista.

Matod ni Arciaga nga posibleng susama usab kini sa Sugbo apan sa bukid lang nga parte diin anaa sa bahin sa Trans-axial highway sa Sugbo.

Ang duha gilauman nga mohatag og 741 megawatts nga supply sa kuryente pinaagi sa hangin.

Magdugang kini og supply sa kuryente sa Sugbo, apan ning higayuna renewable energy ang gigamit. (HBL)