NAGPOSITIBO sa coronavirus disease (Covid-19) ang 10 ka mga kawani sa Northern Mindanao Medical Center base sa report ni Dr. Bernard Rocha, kinsa liaison officer sa maong hospital.

Sa 10 ka mga nagpositibo, usa niini naka-recover na og padayon nga nagtrabaho sa NMMC. Usa usab ang na-admit sa Emerging and Re-emerging Infectious Disease (Ereid) section sa NMMC ug walo ang gipahimutang sa Temporary Treatment and Monitoring Facility sa dakbayan.

Matud ni Retuya, bisan naay mga nagpositibo sa Covid-19 nga kawani sa NMMC, ang hospital wala makinahanglan og dugang nga workforce.

"The news I got from our ICN or Infectious Control Nurse, 75 ka buok ang atong gi-test nga mga high risk na exposures sa ilaha which tested negative naman sa Covid-19," matud ni Rocha.

Ingon ni Rocha nga sa 75 ka buok nga mga empleyado sa NMMC nga gipang swab, siyam lang ang nagpositibo sa reverse transcription-polymerase chain reaction (RT-PCR) test.

Dugang pa niini nga ang maong siyam ka mga empleyado wala naka-assign sa Ereid enclosure sa hospital.

Samtang gi-report ni City Health Office Epidemiologist Dr. Joselito Retuya nga adunay 16 ka mga healthcare workers sa Cagayan de Oro nga nagpositibo sa coronavirus.

Lakip sa 16 ka mga healthcare workers, siyam ang mga medical doctors, lima ang mga nars ug usa ang pharmacist.