NAPULO ka mga establisyemento ang posibleng masira sa dakbayan sa Cagayan de Oro tungod sa mga kalapasan diha sa ilang negosyo.

Kini naglangkob sa mga lodging house, imnanan, spa, internet cafe ug laundry shop.

Matud ni Antonio Resma Jr, RBC secretary ug inspectorate team leader sa Regulatory and Complaint Board (RCB), nga ila na nga gibalik-balik ang mga patigayon ug gihatagan na og higayon nga makumpleto ang mga dokumento.

Dunay mga lodging house nga wala misunod sa pagpa-logbook sa mga mosulod ug mga internet cafe nga padayong nagpasulod sa mga menor de edad.

Matud ni Resma nga nagkatagbo na ang regulatory bodies pinaagi nila ni abogado Edgardo Uy ug duna na kini girekomenda nga closure o pagpasara sa mga nagkadaiyang establisyemento.

Giduso na usab kini sa buhatan sa mayor ug panahon nga maaprob diretso na nila kining ma-implementar.

“Gi-recommend pa man na siya kay ang recommendation naka-attached naman atong closure order, kung di ko masayop mga napulo siguro, grabe gyud ka gahi, gibalik baikan na gyud na sila,” matud ni Resma.

Nasayran nga atol sa mga inspeksiyon sa RCB ubay-ubay ang mga nakalapas nga mga patigayon ug gihatagan una kini og notice of violation apan sa dihang subling gipahigayonan og inspeksiyon nakitang nakalapas gihapon kining maong mga establisyemento.