NAG-EDAD og 12 anyos ang labing bata nga inahan sa dakbayan sa Cagayan de Oro base sa talaan sa City health office (CHO).

Gibutyag ni Dra. Rachel Daba Dilla, city health officer, nga mokabat sa 13 porsinto ang menor de edad nga nanganak sa siyudad.

“Trese porsinto sa tanan nanganak teenager, sa napulo ka buok adunay usa, sa 100 adunay 13 ana under 18 years old, naa gyud ta’y dose nga nanganak sa Cagayan de Oro,” pahayag ni Dilla.

Nagpahimangno ang CHO nga ang maong problema magsugod sa pamilya ilabi na sa dysfunctional families diin mas pili-on sa mga batan-on nga makig-uban sa iyang uyab kaysa magpundo sa gubot nga pamilya.

Naningkamot ang CHO karon nga ma–edukar ang mga batan-on lakip na ang matag pamilya pinaagi na usab sa pagpahigayon og mga programa sama fertility awareness ngadto sa mga tunghaan.

Dinhi mapakita kung unsa ka dako sa problema kung magmabdos sa sayong panahon sama sa pag-undang sa pagtungha ug makapasamot sa ka pobre sanglit maglisod na sila og pangita og trabaho nga modawat nila.

Gidugang pa nga taas usab ang risgo sa kinabuhi kong sayo nga manganak diin kasagaran sa mga nag edad og 14 o 15 anyos ang mamatay atol sa pagpanganak.