NAPALGANG naglutaw na sa dagat ug anaa na sa pagkadugta ang 15 anyos nga minor de edad nga napalgan niadtong Hulyo 17 ning tuig sa Baluarte lungsod sa Tagoloan Misamis Oriental.

Ang biktima giilang si Jun-Jun (tinoud nga identipikasyon gipatago sa kapolisan) residente sa Barangay Bugo ning siyudad sa Cagayan de Oro.

Si Police Senior Inspector Arlyne Ranario tigpamaba sa Misamis Oriental Provincial Police Office nisulti sa SunStar SuperBalita nga kining biktima kuyog sa iyang upat ka mga higala nga nilakaw sa ilang balay niadtong Hulyo 14.

Pagka Hulyo 15 giingong mitabok kini sila sa Tagoloan River apan wala na kini makita sa iyang mga higala.

Niadtong Hulyo 17 napalgan ang iyang patay'ng lawas didto na sa dagat sa Baluarte nga naglutaw ug nakita sa usa ka managat.

Ang amahan sa biktima bout ipaotopsiya ang patayng lawas niini kon pagkalumos ba gyod ang hinungdan sa iyang kamatayon ug wala ba kini gipasipad-an.

Sa pagsulat ning balita anaa na sa Everlasting Peace funeral homes gidala ang patay'ng lawas. (SVB)