MOABOT 155 ka mga overseas Filipino worker (OFW) ang sunod-sunod mga miabot sa Laguindingan Airport sa Laguindingan, Misamis Oriental sugod niadtong Mayo 25 hangtod Mayo 26, 2020 diin gisiguro na daan nga negatibo ang resulta sa ilang mga coronavirus disease (Covid-19) test.

Sila gi-assist sa Department of Interior and Local Government (DILG), Overseas Workers Welfare Administration (OWWA), Civil Aviation Authority of the Philippines (CAAP), Department of Tourism ug uban pa nga ahensya.

Ang pagdawat kanila pinasubay sa koordinasyon sa Regional Inter Agency Task Force ug sa ilang paghidangat tagsa-tagsa sila nga gidawat sa mga local government unit sa rehiyon.

Lakip kini sila sa 24,000 ka mga repatriated OFW sa Pilipinas nga gipauli paingon sa Visayas ug Mindanao.

Adunay 19 ka sweeper flights nga maoy sakyan niining mga OFW pagpauli sa ilang tagsa-tagsa ka mga destinasyon human na-comply ang usa sa requirements nga kini sila negatibo ang resulta sa coronavirus test pinaagi sa reverse transcription-polymerase chain reaction (RT-PCR) lakip ang pagkakumpleto sa ilang 14 ka adlaw nga kwarantinas sa NCR accommodation establishments o quarantine facility.

Kamandoan ni Presidente Rodrigo Duterte nga dawaton sila sa tagsa-tagsa ka lungsod kung adunay mga gipakita nga mga kumpleto nga dokumento aron makabalik na sa ilang pamilya.

Sa Misamis Oriental, adunay 33 ka mga OFW nga gitabo sa lokal nga kagamhanan.

Si Governor Bambi Emano namahayag nga busy ang task force sa pag-atiman kanila aron sila maplastar, makabalik sa ilang pamilya kinahanglan lamang nga nahisubay sa insaktong health protocols ug guidelines.

Samtang ang dakbayan sa Cagayan de Oro adunay natala nga 37 ka mga returning OFWs nga giatiman na karon sa kagamhanan.

Gibutyag ni Mayor Oscar Moreno nga nagbantay ang siyudad labina nga kini ang dunggoanan sa mga moabot nga gikan sa nagkalain-laing dapit ug labina niining mga OFW.