MGA 29 ka indibidwal ang anaa karon sa prisuhan human sa usa ka adlaw nga operasyon sa nagkalain-laing municipal police station sa Misamis Oriental Provincial Police Office.

Kini subay sa ilang pagpahigayon sa Simultaneous Aggressive Police Operations (SAPO) sa Police Regional Office (PRO)-Northern Mindanao.

Matud ni Police Major Princess Joy E. Velarde, ang spokesman sa Misamis Oriental Police Office, nga kini nga operasyon niadto lamang Enero 28, 2020.

Dugang niini nga mas daghang nadakpan ang Gingoog City Police Station sa pagpanguna ni Police Lieutenant Colonel Ariel Phillip Pontillas.

Sa kinatibuk-an, adunay 29 ang naaresto walay labot niini ang mga 164 ka traffic violators ug 15 sa overloading.

Sila pulos gipang-isyuhan og citation ticket.

Sa maong gidaghanon moabot sa 17 wanted person ang naaresto, ug tulo ang nasilbihan sa search warrant.

Sa accomplishment sa ginadili nga druga, pito ang arestado ug 15.5 gramos sa shabu ang nasakmit.

Sa Oplan Katok, adunay upat ka mga loose firearms nga naturn-over ug lima ka indibidwal arestado sa illegal gambling.

Kamanduan ni Police Colonel Robert Roy Bahian, ang director sa Misamis Oriental Police Office, nga padayunon sa kapulisan ang ilang kaikag sa pagpangdakop labina kadtong pabiling nagtagotago sa balaod gumikan sa balaud kay basin unya og makapangbiktima pa og lain ug makahimo og laing krimen.