ANAA sa 499 ka mga indibidwal ang padayong nag-quarantine gikan sa Marso 14 hangtod sa Hunyo 2 sa nagkadaiyang isolation unit sa dakbayan sa Cagayan de Oro.

Mokabat sa 1,058 ang total nga ihap sa new arrivals gikan Marso 14 hangtod Hunyo 2 human nadugangan kini og laing 15 ka indibidwal.

Gibutyag ni Dr. Lorraine Nery nga sa maong ihap, 499 niini ang naka-kwarantinas sa City Isolation Units (CIUs) ug dunay pipila usab nga naka-home quarantine, kinsa padayon nga gi-monitor.

Giingong kini gilangkoban sa mga overseas Filipino workers (OFW), Locally Stranded Individual (LSI), mga indibidwal gikan sa nagkalain-laing rehiyon ug mga nakuha sa mga quarantine control points.

“Among these 1,058 ang atong ongoing lang nga naka-quarantine karon is only 499. Apil nana dinhi sa 499 ang mga nagkalain-lain nato nga mga returning OFWs, ang atong mga locally stranded individulas nga nangabot through our sweeper flights or through our mercy voyages,” matud ni Nery.

Sa Hunyo 2, wala’y natalang nagpakita og mga sintomas o mga acute respiratory illness (ARI) ug influenza-like illnesses (ILIs) apan padayon kini nga gimonitor sa matag adlaw.

“As reported wala ta’y nakita nga nag-manifest og ARI or mild ARI nga mga symptomps or influenza-like illnesses but padayon gihapon nato ni sila nga i-monitor day to day,” dugang ni Nery.

Ang mga kaniadto nga new arrivals nga nakitaan og sintomas natambalan na sa ilang mga gipangbati ug nangaayo na.