LIMA ang natalang namatay sulod sa usa ka adlaw sa siyudad sa Cagayan de Oro.

Kini ang gikumpirmar ni Dr. Joselito Retuya, ang epedimiologist sa City Health Office, atol sa daily press briefing adlawng Lunes, May 11, 2020.

Sa record, unang pasyente mao kining 74 anyos nga lalaki nga taga Barangay Nazareth, siyudad sa Cagayan de Oro, niabot gikan sa Cebu City niadtong bulan sa Pebrero.

Gidala kini sa usa ka pribadong hospital gumikan kay nawad-an og panimoot ug adunay hilanat basi sa assessment sa pribadong hospital.

Gibalhin kini sa Northern Mindanao Medical Center (NMMC) ug diagnosis sa maong tambalanan mao kining aneuration secondary to acute sub-dural hematoma, non-depressed lineal fructured hemorhagic contusion, adunay pre-existing nga diabetes mellitus ug kini suspek sa Covid-19.

Namatay kini adlawng Dominggo sa alas 4:30 sa hapon. Gikuhaan na og swab test ug pending pa ang resulta niini.

Gipahigayon na usab ang contact tracing sa pito ka mga direct contact.

Ikaduha ang 71 anyos nga lalaki gikan gawas sa Cagayan de Oro nga gi-admit sa pribado nga hospital.

Sa inisyal nga diagnosis, aduna kini community acquired pneumonia.

Nakabsan sa kinabuhi niadtong adlawng Dominggo. Negatibo ang resulta sa Covid-19 sa gipahigayon nga rapid diagnostic test sa pribadong hospital.

Ikatulo kining 62 anyos nga lalaki nga taga Macasandig kinsa gidala sa ospital gumikan sa hilanat sulod sa tulo ka bulan, galisod pagginhawa sulod sa usa ka semana ug aduna sab kini kasaysayan sa hypertension ug chronic kidney disease.

Negatibo sab ang resulta niini sa Covid-19 sa rapid diagnostic test nga gihimo sa pribadong hospital. Gi-cremate kini Lunes, Mayo 11.

Ikaupat nga biktima ang 68 anyos nga lalaki nga taga Baranngay Tablon, ning siyudad. Dead on arrival kini sa JR Borja Hospital sa Carmen mga alas 7:20 sa gabii, Mayo 10, gumikan sa sudden cardiac death.

Padayon pa nga giimbestigahan ang kamatayon niini.

Ikalimang nakabsan sa kinabuhi kining 81 anyos nga babaye gikan sa Barangay 25 nga namatay sulod sa puloy-anan. Wala gikataho nga nagbiyahe, walay hilanat, walay ubo ug natala nga hypertensive.

Sa dugang imbestigasyon, gi-cleared kini sa DOH nga non-Covid human sab nga bedridden sulod sa tulo ka semana.

Matud ni Retuya nga samtang gipaabot ang resulta niadtong taga Nazareth ug sa Barangay Tablon, aduna na silay mga intensive monitoring ug surveillance nga gihimo sa mga posibleng nakapaduol sa mga biktima pagpangandam kon ugaling positibo ang resulta sa ilang swab testing.