GIKLARO sa Department of Health (DOH) nga wala pa'y pagtuon kalabot na sa nikatag sa social media nga makapawala sa lamok ang ahos.

Gibutyag ni Dr. David Mendoza, OIC director, nga wala pay pagtuon kalabot na niining nagkatag sa social media nga ahos nga gihulom ang katunga sa tubig nga anaa sa botelya.

Nasayran nga klase-klaseng mga komento diin dunay gaingon nga kini epektibo, samtang ang uban niingong mas makadaghan sa lamok ilabi na nga nagpundo ang tubig diha sa botelya.

"I don't have any data on that matter. Wala gyud study pero usually, murag parehog epekto sa tanglad, citronella. No final say until naa tay study ana," matud ni Mendoza.

Gidugang pa nga mas maayo pa ang citronella kung ugaling tungod kay nasulayan na kini nga epektibo.

"Wala ko nag advised mas maayo pa siguro og tanglad, mo advise pa ko because its proven already ang citronella," dugang pa.

Apan mas gi-aghat niini ang katawhan nga manglimpyo ang tanan ug kanunayon ang 4'o clock habit o pagpanglimpyo matag adlaw.

Nasayran nga anaa na sa 70 ang natalang patay sa Northern Mindanao gikan Enero hangtod Agusto 17 ning tuig 2019.