SWERTENG dali nga natabang ang usa ka babaye kinsa misulay sa paghikog ginamit ang headscarf nga gihikot sa iyang li-og niadtong Oktubre 12, mga ala 1 sa kaadlawon sa Guillermo/Yacapin streets, dakbayan sa Cagayan de Oro.

Nagpaalim na sa Northern Mindanao Medical Center (NMMC) ang biktima nga naila lamang sa ngalan nga “Rhoda,” 20 ngadto na sa 30 ang pangidaron, walay panimalay ug giingong usa ka rugby girl.

Sa nahipos nga impormasiyon gikan sa kapolisan sa Police Station 2 (PS2) sa Cogon, gikabutyag nga nakadawat na lamang kini sila og tawag gikan sa guwardiya sa usa ka patigayon hinungdan nga daling narespondehan ang maong panghitabo.

Giingong nakitang nagginhawa pa ang biktima hinungdan nga dali kining gipuwas sa usa sa mga sakop sa kapolisan kinsa una nga nakaresponde ug naluwas ang biktima kinsa daling gidala sa Oro rescue sa NMMC.

Padayon pa ang pagpaalim sa biktima ug padayon pa nga gisuta kung unsa ang hinungdan sa pagsulay sa pagpakamatay niini.