NAGPAHIMANGNO ang Cagayan de Oro City Health Office (CHO) nga magbantay sa “heat stroke” karong umaabot nga paghandum sa Semana Santa tungod sa nasinati nga kainit sa panahon labina kadtong dunay mga sakit sa kasing-kasing, mga taas ang dugo ug dehydration.

Matud ni Dra Fe Bongcas, city health officer, nga mag-amping ang katawhan ilabi na sa moduyog sa mga pagsaka sa mga balaan nga dapit ug sa estasiyon sa krus ug uban pang kalihokan sa maong mga adlaw.

Gidugang ni Bongcas nga sa pagkakaron wala pay kaso niini ug nanghinaot nga unta wala makasinati niini.

“As of now, wala pa sad tay kaso na nag-heat stroke, (I) hope next week kay Holy Week naman mao na atong bantayan,” matud ni Bongcas.

Nasayran nga kong itandi sa niaging tuig mas minus ang kainit karong panahona.

Nagpahimangno usab kini sa katawhan nga magdala og pang proteksiyon sa kaugalingon batok sa kainit sa panahon sama sa payong, kalo ug uban pa ug likayan ang mga dapit nga anaa ang bagang duso sa katawhan.

“As much as possible drink plenty of water, take more vitamins para ma booster ang immune system and go away from very crowded places kay usually diha ta makakuha og infectious nga mga sakit,” pahimangno niini.