SUPAK ang City Social Welfare and Development (CSWD) pagpa-ubos sa criminal liability sa mga batan-on gikan sa 15 anyos sa kasamtangan ngadto sa 9 anyos.

Tungod niini, gibutyag ni Kagawad Reuben Daba, tsirman sa Social Services sa Konseho sa dakbayan, nga magpatawag siya og emergency meeting aron mapaabot sa Kongreso ang ilang pagsupak.

Matud ni Daba nga angay kini nga sutaon og maayo.

“Mag-emergency meeting kami sa City Council for the protection of children kay maghimo kami og prayer nga among ipaabot nga dako kaayo mig supak nga nag edad og 9,” matud ni Daba.

“Usa akong oposisyon sa siyam, ako mismo dili gyud ko mo support sa siyam ug uban sa akong mga kauban sa CSWD ug sa City Council for the protection of children kay ngano bata ra gyud kaayo na,” matud ni Daba.

Apan giingong una na kini nga uyon nga paubsan ang edad apan gikan sa 15 himuon kining 12 anyos.

“Mga first year sa term as councilor naghimo ko og prayer didto sa hawanan sa kongreso nga gihangyo nako nga ang 15 anyos i-ubos sa 12 anyos kay mao man na ang karaan gyud nato, that is on 1935 constitution kay dili sad nato malimod nga gabata-bata ang gahimo og krimen,” matud ni Daba.

Buot usab niini nga hangyuon ang mga interfaith o mga relihiyosong grupo nga ibalik sa mga kabataan ang pagmatuto diha sa pagbaton og kahadlok sa Ginoo, ilabi na nga sa panahon karon anaa na sa mga social media nakatutok ang mga bata, nga nakahatag og mga dautang impluwensiya sama sa Dota ug uban pa.

Angayng itudlo usab kanila ang pagrespeto ug bisan sa pag-ampo sa atubangan sa pagkaon ug pagpangayo og katahoran.