GATOSAN ang mga nagparehistro sa unang duha ka adlaw sa voters registration nga gipahigayon sa Commission on Elections (Comelec) sa siyudad sa Cagayan de Oro.

Anaa sa 449 ang malampusong nakaparehistro gikan Agusto 1, 2019 ug Agusto 2, 2019. Samtang sa unang adlaw, anaa sa 147 ang nakaparehistro.

Sa pakighinabi sa SunStar Superbalita kang Attorney Ramil Acol, City Comelec Officer, gibutyag niini nga mas daghan ang mga nakaparehistro sa unang adlaw kumpara kaniadtong mga nilabay nga pagpangrehistro.

"449 na for 2 days. Medyo mas daghan ni karon," matud ni Acol.

Nasayran nga nagsugod ang pagpangrehistro alang sa voters registration sugod Agusto 1 hangtod Setiyembre 30 alang sa pagpangandam sa eleksiyon sa Barangay ug Sangguniang Kabataan (SK) sa Mayo 11, 2020.

Giingong kini tungod kay wala pay balaod nga nag-uktaba sa umaabot nga eleksiyon.

Nagdawat ang Comelec og mga magparehistro sa SK nga nag-edad og 15 ngadto 30 ug regular nga aplikasiyon sa Barangay voters.