“Nagtuo diay siya modaog siya,” kini ang gipaabot ni Misamis Oriental Governor Yevgeny Vincente Emano ngadto kang Cagayan de Oro Mayor Oscar Moreno nga nagsulti nga mo-resign kini kung ang modaog sa umaabot eleksyon sa pagka-bise mayor si Dongkoy Emano.

Atol sa iyang programa sa radyo, gikataw-an ni Emano ang gipamulong ni Moreno tungod kay wala man gani kini miresign bisan kapila na gi-dismissed sa iyang mga kaso.

“Wala man gani na moundang diha nga daghan na kaayo iyang kaso. Isa ka libo ug siyete mil naman siguro na. Grabe na kaayo iyang gibuhat nga pag panghimaraot ug pagpangtrampas sa katawhan unya moresign na hinuon siya?” matud ni Emano.

Hagit sab niini nga karon dayon mohawa na kini sa pwesto.

“Nganong karon dili man deretso. Mga igsuon ko, magpailad palang gihapon ta? Magpahaylo pa lang ba gihapon ta?” dugang niini, ug miingon nga dili man gihapon kini modaog sa eleksyon kay iyang kaatbang man nga si Pompee La Viña ang mapili.

“Nganong mag-resign man siya? Nagtuo ba diay siya modaog siya karon nga eleksyon? Bag-o na ang mayor si Pompee na,” pahayag ni Emano.

Unang namahayag si Moreno nga kung siya ang mapili pagka-mayor sa umaabot eleksyon ug si Dongkoy Emano ang mapili sa pagka-bise mayor daw mo-resign siya sa posisyon tungod kay nagtuo siya nga mobabag kini sa iyang mga plano alang sa siyudad.