ABO na lamang ang usa ka balay human kini naugdaw dihang miulbo ang sunog sa Barangay Poblacion, lungsod sa Tagaloan, Misamis Oriental.

Gipanag-iyahan kini ni Jaime Alaba, residente sa susamang dapit kinsa miangkon nga naglapog siya kilid sa ilang balay ug iyang nabiyaan labina wala man niya gidahom nga mokaylap diay ang kalayo.

Mao na lamang ilang gikakurat nga nagkalayo na ang kilid sa ilang balay ug bisan unsaon pagsablig og tubig dili na kini matabang.

Gani si Alaba nasamdan atol sa insidente sa paningkamot niini nga masalbar ang puloy-anan.

Dali sab miresponde ang bombero sa maong lungsod apan giingong naugdaw na ang puloy-anan. Hinuon wala na kini mikaylap pa sa mga kasikbit nga puloy-anan.

Si Alaba ang nagpaalim pa karon sa iyang samad ug paso nga naangkon sa usa ka balay tambalanan sa maong dapit.

Ang mga bombero nanawagan sa katawhan nga tungod sa kainit sa panahon karon bantayan kining paglapog-lapog kay usa kini maghinungdan sa sunog.

Kon maglapog man gali, kinahanglan nga magtapad ug balde sa tubig. (SVB)