PATAY ang usa ka habal-habal driver human gipusil sa wala mailang suspetsado mga alas 7:15 sa buntag Miyerkules, Pebrero 26, sa Barangay Road of P-1, Merangeran, Quezon, Bukidnon.

Giila ang biktima nga mao si Eric B. Ganding, taga P-4, Lumintao, Quezon, Bukidnon.

Sa inisyal nga imbestigasyon sa Quezon Police Station, nasuta nga namasahero lamang kining biktima.

Aduna kini sakay nga duha ka mga menor de edad niadtong tungora dihang paghidangat sa dapit kalit kining gitabo sa motorsilklo sakay ang duha ka suspetsado ug deretsong gipusil makatulo ka higayon hinungdan nga misarasay kini sa kalsada.

Naigo ang biktima sa iyang ulo maoy hinungdan sa iyang hinanaling kamatayon. Suspek gilayon misibat.

Ang duha ka mga menor de edad ang samdan gihapon gumikan sa pagkaligid sa motorsiklo.

Sa pagkakaron, padayon pa nga giombestigahan sa kapulisan ang motibo sa pagpamusil.