DILI buot ni Misamis Oriental Governor Yevgeny Vincente Emano nga pangunahan ang kapulisan sa Misamis Oriental Provincial Police Office niining nagpadayon ang giyera kontra druga.

Apan masaligon kini nga ihatag ang tanan niyang suporta ngadto kanila.

Misalig usab si Emano nga dili gyod magbinuang atol sa mga operasyon ang mga drug personnel nga maoy nagpahigayon sa mga drug operation sa probinsya tungod kay dako iyang pagsalig sa liderato ni Police Senior Superintendent Rolando Destura.

Reaksyon kini ni Emano sa mga pangutana sa press kalabot sa mga napatay nga mga drug suspect atol sa mga operasyon.

Dugang niini nga taliwala sa hugot nga kampanya ni Presidente Rodrigo Duterte, aduna gyod gihapon pipila nga nagpadayon sa ilang iligal nga kalihokan.

Bisan pa nga giingnan na sa presidente nga ang kampanya sa ginadili nga druga magpadayon, aduna gihapon pipila nga walay kahadlok tungod kay gakakuhaan man gihapon sa ginadili nga druga atol sa mga operasyon.

Malaumon si Emano nga sa pagdonar niya og mga body camera unta mapuslan kini og maayo ug mahatagan og katin-awan ang katawhan kung unsa gyod ang tinoud nga nahitabo panahon sa mga operasyon.