NAGLASONG ang usa ka lalaki sulod sa bar sa Corrales Street, dakbayan sa Cagayan de Oro dihang nakita ang babaye nga ni-basted kaniya.

Tungod sa kahadlok, nagpakitabang sa kapulisan si Vina (dili tinuod nga ngalan), 20, dalaga, taga Pagalungan ning siyudad ug gireklamo si Gerald, 27, taga Carmen ning siyudad.

Sa impormasiyon nga nahipos gikan sa kapulisan, gikabutyag nga samtang anaa sa maong bar kalit lamang nga nasuko si Gerald ug niluwat og pahayag pinaagi sa kusog nga tingog atubangan sa mga kustomer nga dili kini ang gipili ni Vina tungod kay usa lang kini ka mag-uuma.

Giingong kini ang gibutyag niini sa daghang tawo “dili ka ganahan sa ako kay wala koy ikadatong sa imo kay mag-uuma rako! Diha gyud ka sa foreigner kay maka provide tanan nimo gusto!” Nga gikaulaw pag-ayo sa biktima ug gani nidugang pa kini sa pag-ingon nga “Labayon ta nuon kag botelya run,” rason sa kabalaka sa dalaga.

Ang maong insidente ang nakatala na sa buhatan sa kapulisan.