DILI pa matino sa kapolisan kung unsay motibo sa pagpatay sa usa ka lalaki nga napalgan mga alas 4:25 sa hapon adlawng Lunes sa Zone-7, Barangay Linggangao, lungsod sa Balingasag, Misamis Oriental.

Giila ang biktima nga mao si Pablo S. Runtal, 51, residente sa susamang dapit.

Igo na lamang nakadawat og tawag ang Balingasag Police Station sa nagpahibalo nga dunay patayng lawas sa dapit.

Sa pagresponde sa nga polis didto, ilang nakita si Runtal ug nadiskubreng aduna kini samad sa iyang ulo nga gitouhang giposposan sa hait nga butang.

Mao sab kini ang gitouhang hinungdan sa iyang kamatayon.

Gidala sab kini sa Misamis Oriental Provincial Hospital sa Balingasag apan si Dr. Helen M. Romualdo niingon nga posibleng 29 oras na kini gikan gipatay.

Sa pagkakaron, ang kapolisan nagpahigayon pa og lawom nga imbestigasyon kalabot sa insidente labina gyod ang pagtumbok sa suspetsado ug pagsikop niini.