NAKATULOG sulod sa prisohan ang usa ka lalaki human gisumbong nga nagpakita sa iyang "junior" ug giingong nangiyod samtang nagtan-aw og kalingawan sa Kuyamis Festival niadtong Enero 8 dinhi sa hawanan sa Kapitolyo.

Ang maong lalaki naila nga si Mark (dili tinuod nga ngalan), 28, ulitawo, taga Initao, Misamis Oriental ug usa ka trisikad drayber.

Base sa impormasiyon, gikabutyag nga nanumbong ang usa ka babaye human giingong gipalusot sa suspetsado ang iyang "junior" ug gibinastosan ang biktima.

Samtang sa pakighinabi sa Superbalita Cagayan de Oro, gipanghimakak ni Mark ang alegasiyon ug giingong gipasanginlan lang siya nga iyang gidulaan ang iyang junior samtang naglantaw sa biktima.

Gibutyag niini nga gakahulos ang iyang zipper ug luag sab ang iyang gisuot nga brief rason sa posibleng paggimaw sa junior.

"Matangtang akong butones ba, nahulos ang zipper sa akong pantalon, luag pud akong brief," matud ni Mark.

Nagpasalamat nalang usab kini nga wala gitinuod sa nagreklamo gani naghilak pa kini sa pagpangayo og pasalamat ug pasaylo.

"Pasalamat ko, kung sa hunahuna nila gabinastos ko sa ila, mangayo lang ko og pasaylo," pahayag niini.

Samtang nakagawas na ang suspek human nga wala na nagduso pa ang biktima og kaso.