BALHOG sa prisuhan ang usa ka lalaki nga giingong adunay kasong murder ug nagtago-tago sa lungsod sa Claveria, Misamis Oriental.

Si Police Chief Inspector Raymund Lumapay, hepe sa Claveria Police Station, miila sa dinakpan nga si Antonio Cuartes, 38, lumad nga taga Barangay Kili-Kili, Wao, Lanao del Sur.

Gibutyag ni Lumapay nga anaa sa ika numero sais most wanted person sa lungsod sa Wao si Cuartes apan human sa insidente nagtago ug misibat paingon sa lungsod sa Claveria.

Wala na kini mihatag og detalye sa kaso apan giingon niining nakapatay kini sa dapit.

Nakigkoordinar ang Wao Police Station sa ilang buhatan hinungdan ilang gi-monitor ang nahimutangan niini ug nagpositibo nga naa sa Barangay Madaguing, sa Claveria, human giingong nagtabang tabang kini sa pag-uma sa ig-agaw niini.

Gisilbi nila ang warrant of arrest batok niini ug nadakpan ang suspek.

Matud ni Lumapay nga gidala na sa kapolisan sa Wao ang dinakpan kon diin didto natigayon ang krimen ug kasong murder giatubang ni Cuartes ug walay piyansa nga girekomendar.