GIPILDI sa Division of Lanao del Norte ang 13 ka mga partisipante sa Higalaay choral competition 2019 niadtong Agusto 22 sa Central Ayala Mall, Siyudad sa Cagayan de Oro.

Emosyonal ang mga estudyante human nga gi-anunsyo nga maoy nahimong mananaog sa Higalaay choral competition 2019.

Nasakmit sa Division of Lanao del Norte ang kampyonato diin dunay premyo nga P100,000, gisundan sa Division of Iligan City P70,000 ug Division of Oroquita City nga nakadawat og P50,000. Samtang nakadawat usab og tag P10,000 ang mga nisalmot diin lakip niini ang Division of Bukidnon, Division of Malaybalay City, Division of Tangub City, Division of Gingoog City, Division of Valencia City, Division of Camiguin, Division of El Salvador City, Division of Misamis Occidental, Division of Misamis Oriental, Division of Ozamis City ug Division of Cagayan de Oro City.

Mapasalamaton usab si Dr. Rubin Tabar, education program supervisor sa MAPEH ngadto sa lokal nga kagamhanan sa Siyudad sa Cagayan de Oro sa oportunidad nga gihatag aron nga makapartisipar ug mapalambo pa ang mga estudyante dili lamang sa academic apan lakip na sa mga extra-curricular activities.

Giingong gihimo lamang nila ang ilang pinakamaayong buhaton rason nga malampusong nasakmit ang kadaugan.

"We did our best in the competition, one of the best practices that we had, one is focus, number two is discipline. Well-disciplined yung mga bata namin and of course trust in God," matud ni Tabar.

Giingong tumong lamang niini nga mapalambo ug ma-promote nila ang kultura sa Lanao del Norte gani anaa sa mga P134,000 ang ilang gasto sa ilang 25 ka mga estudyante lakip na ang transportasyon ug ubang galastuhon.

"Our purpose is to expose our students and also to promote the culture and arts of Lanao del Norte," dugang pa.

Nasayran nga nahimo usab kini silang mananaog o champion sa national level sa Himig Bulilit sa elementarya ug Sped learners nga partisipante, ikaduhang higayon na usab nga nahimong champion sa Higalaay Festival, ug nagrepresentar usab sa national level sa Northern Mindanao niadtong 2018.

Nagpasalamaton usab kini sa lokal nga kagamhanan sa siyudad sa oportunidad aron mapakita ang kultura sa Lanao del Norte ug sa uban pa.

Samtang nibutyag si Mayor Oscar Moreno kinsa lakip mismo kini sa nilantaw sa maong kalihukan nga ang kapistahan sa siyudad ang labing importante ug makahuloganon nga saulogon kini sa tanan.

“Pasalamat ko sa DepEd (Department of Education) for bringing the entire region together to celebrate the feast of St. Augustine ug sa iyang inahan nga si Sta Monica," matud ni Moreno.