GIINGONG anaa na sa luwas nga kahimtang ang 32-anyos nga maestra human gipusil sa upat ka wala mailang suspetsado kagahapon mga alas 8:00 sa buntag, Oktubre 15, sa Barangay Lumbayao, Valencia City, Bukidnon.

Giila ang biktima nga mao si Zhydee Bitago Cabañelez, 32, magtutudlo sa Dalit Elementary School.

Minyo kini ngadto kang Ramil Cabañelez, kinsa usa sab gihapon ka magtutudlo.

Sa inisyal nga imbestigasyon sa Valencia City Police Station sa pagpangulo ni Police Lieutenant Colonel Surki Sereñas nasuta nga anaa ang magtiayon sulod sa classroom dihang ang upat ka armado ang kalit misulod sa classroom ug namusil.

Ang duha sakay sa motorsiklo.

Atol sa pagpamusil, ang bana niini nakasibat.

Si Zhydee nakaangkon og samad ug anaa na sa luwas nga kahimtang karong panahona.

Ang maestra giingong anak ni Zaldy Bitago, tag P-8, Sinabuagan, Valencia City, kinsa gialegahan nga miyembro sa Guerilla Front 6 NCMRC sa New People's Army ug giingong aktibo sa pagpangilkil sa Sinabuagan quarry area.

Padayon pa ang pagukod sa kapolisan sa mga suspek lakip ang pagberipika sa dugang pang impormasyon sa biktima.