NAUGDAW ang duha ka andanang mansyon human ni-ulbo ang kalayo mga alas 11:47 Biyernes sa gabii, Mayo 17, sa Julio-Pacana Street, Barangay Puntod, sa siyudad sa Cagayan de Oro.

Mokabat sa P1 milyon ang damyos sa naugdaw nga duha ka andanang mansyon kinsa gipanag-iyahan sa pamilyang Sia.

Gibutyag ni Senior Fire Officer 3 Samson Velarde, sa Bureau of Fire and Protection, nagsugod ang sunog sa bakanteng lawak sa ikaduhang andana sa maong dakong panimalay.

Gibutyag ni Velarde nga gitutokan sa imbestigasiyon karong panahona mao ang linya sa kuryente.

“Taas nga anggulo nga gitutokan sa investigasyon kay nagsugod man sa ceiling portion basta mga ingon ana possible electrical emission but dili pa gyud na, imbestigahan pa,” matud ni Velarde.

Niabot sa ika upat nga alarma ang maong sunog diin nakontrolar kini mga alas 12:41 ug gideklarang fire out mga ala 1:28 sa kaadlawon.

Sa pagkakaron padayon pa ang imbestigasiyon kalabot sa maong kalit nga pag-ulbo sa kalayo nga nilamoy sa tibuok nga ikaduhang andana sa nahisgutang mansion.