ADUNA nay limitasyon ang mga sakop sa prensa sa pagkuha og record diha sa police blotter o mga crime incident report.

Kini ang gipasabot ni Police Lieutenant Colonel Mardy Hortillosa, kinsa tigpamaba sa Police Regiona Office (PRO)-Northern Mindanao.

Matud niini nga nagpagawas og bag-ong kamandoan ang higher headquarter nga limitahan na ang pagkuha og inpormasyon diha sa police blotter base sa circular memorandum 2020-037 kabahin sa pag-access sa police blotter.

"Hindi na basta-basta makakuha ng kopya o ipa-xerox, or picturan ng kapatid natin na media 'yong police blotter at bawal na po itong i-post sa social media," kini ang pahibalo ni Hortillosa.

Apan pagklaro niini nga mahimo gihapon nga makakuha ang mga sakop sa prensa sa mga inpormasyon lakip na niini ang mga accomplishment report.

Si Regional Director Police Brigadier General Rolando Anduya,n atol sa iyang paglingkod isip dako sa PRO-Northern Mindanao, usa sa mandato niini mao ang paghimo og Viber groupchat sa mga media personalities ug mga chief of police sa tanan police station aron didto i-send ang ilang mga accomplishment report o mga incident report.

Butang nga gikabalaka sa pipila ka sakop sa prensa gumikan niining bag-ong kamandoan.

Apan pagklaro ni Hortillosa nga dili walaon ang Viber groupchat ug pabilin nga masayod ang mga prensa sa unsa man nga mga insidente nga angayan masayran sa katawhan.