GISUNOG sa Anti-African Swine Fever Task Force kauban ang National Veterinary Quarantine Service (NVQS) ang 600 kilos nga karneng baboy nga gikan sa Davao City niadtong Pebrero 20 sa Upper Puerto, Siyudad sa Cagayan de Oro.

Anaa sa mga P300 mil ang kantidad sa maong karneng baboy sulod sa meat van nga napahunong atol sa checkpoint.

Gikabutyag nga walay shipping permit ug certificate gikan sa National Meat Inspection Services (NMIS) ang maong kargamento ug nakalapas usab kini sa Executive Order No. 172 sa dakbayan.

Kahinumdoman nga hugot nga gipatuman sa dakbayan ang pag-ban sa mga produktong baboy nga nagagikan sa Luzon ug sa mga dapit nga apektado niini.

Nasayran nga gikumpirma sa Department of Agriculture-Davao Region nga nagpositibo sa ASF ang blood sample gikan sa mga baboy sa pipila ka mga dapit sa Davao del Sur.

Kahinumdoman nga hugot ang pagmonitor sa tinugyanan sa ASF task force aron nga dili makasulod ang maong sakit sa mga baboy dinhi sa dakbayan.