NAGHATAG na usab og lugway sa oras ang mga dagkong patigayon o mall sa siyudad sa Cagayan de Oro alang sa nagkaduol nga kasaulogan sa Pasko.

Sukwahi sa regular nga mga panahon nga hangtod alas 10:00 sa gabii lang ang mga mall, apan karon mas gilugwayan aron nga mahatagan og panahon ang mga trabahante o empleyado nga dugay makapauli ug wala nay panahon nga makapamalit sa mga panginahanglanon.

Mapasalamaton ang tsirman sa komitiba sa Trade and Commerce nga si Konsehal George Goking nga mismo ang mga patigayon na ang naghatag og mga oras diin ang uban dugay manira samtang ang uban sayo nga magbukas sa ilang patigayon.

"Sila mismo naay uban nga naghimo og oras. Ang uban 10:00 to 11:00, ang uban earlier ang opening, ang uban late magsira," matud ni Goking.

Gidugang pa niini nga dako kaayo ni og tabang ilabi na diha sa trapiko tungod kay maminosan ang mga mamalit sa panahon sa adlaw ug didto na sa gabii tungod sa paglugway sa oras.

Ug gawas niana, mas komportable usab kay dili man init kung sa gabii na makapamalit.

"Dako kaayo og tabang sa traffic ug ang mga tawo di na magdali mamalit," dugang pa.