BUOT ni Cagayan de Oro City Mayor Oscar Moreno nga ipaubos pa gihapon ang dakbayan sa modified general community quarantine (MGCQ) sa umaabot nga Miyerkules, Hulyo 1, 2020.

Kini tungod matapos na ang kamandoan gikan sa Inter-Agency Task Force kalabota sa mga nagkadaiyang kwarantinas sa mga dapit karong Hunyo 30.

Gibutyag ni Moreno nga alang kaniya, mas maayo nga magpabilin pa gihapon ang MGCQ tungod importante nga magpuyo sa balay ang mga residente. Ug kon dili importante ang lakaw, dili na lang mogawas.

“Ang ako is permanente lang gihapon modified general community qurantine and stay at home is very essential component. Kon dili kinahanglan nga mogawas, pagpuyo sa balay and of course non-pharmaceutical interventions importante,” matud ni Moreno.

Giingong importante usab kaayo ang pagpadayon sa gabayan sa Department of Health nga maoy pinakapektibo aron makalikay nga mataptan sa Covid-19, sama sa pagsul-ob og face mask, paghugas sa kamot, social distancing ug stay at home.

“The winning goal has to be made by the people. Mao gyud na by the people mao nang importante kaayo ang kooperasiyon sa katawhan,” dugang pa niini.