NI-APELA si Mayor Oscar Moreno sa dili mga taga Cagayan de Oro nga mosulti sa tinuod nga address ug dili mogamit sa dakbayan sa Cagayan de Oro tungod kay bukas man ang siyudad sa tanan kung duna'y tuyo sa Northern Mindanao Medical Center (NMMC).

Kini human dunay mga pasyente nga nigamit og address sa siyudad labi na sa Nazareth ug sa Cugman sa kabalaka nga dili pasudlon sa NMMC kung dili taga dakbayan.

Gihangyo ni Moreno ang mga taga laing dapit magsulti sa ilang tinuod nga mga address kini aron usab nga dili maglisod sa pag-contact tracing kung ugaling man. Gisiguro usab niini nga bukas kanunay ang NMMC.

"Dili man nila kailangan mogamit og address sa Cagayan de oro, ato ning apela sa atong mga kaigsoonan sa laing mga lugar dili kinahanglan kay ang Cagayan de Oro isip host sa NMMC dili namo kamo sirhan sa pultahan," matud ni Moreno.

Gidugang pa nga wala'y gibawal sa NMMC labi na kadtong magpatambal ug labaw sa tanan ang pagduda kung apektado na kini sa coronavirus disease (Covid-19).

"Naa moy tuyo sa NMMC pwedi mo makasulod walay bawal so di kinahanglan nga mogamit og address sa Cagayan de Oro," dugang pa.