PATAY ang usa ka lalaki human gi-hit and run sa wala mailang drayber sa pribadong sakyanan niadtong Septiyembre 13 sa gabii sa Taytay, El Salvador City, Misamis Oriental.

Patay si Diosdado Gabule, 52, residente sa maong dapit samtang ang drayber nga nisibat nagmaneho sa usa ka awto.

Sa impormasiyon, giingong nitabok sa national highway ang biktima apan wala niini nabantayan ang naghaguros nga sakyanan.

Giingong gisuta pa ang gikatahong lango sa ilimnong makahubog si Gabule.

Gidala pa sa balay tambalanan ang biktima apan wala’y swerteng nakabsan sa kinabuhi.

Pabilin pa usab nga gawasnon ang suspek kinsa gibiyaan lamang ang biktima human kini nabanggaan.