MOABOT sa P9,000 ang multa sa usa ka mamaligyaay og pan human nasapon nga nigamit og plastik makatulo ka higayon atol sa Higalaay Carnival competition niadtong Agusto 25 sa rotunda sa siyudad sa Cagayan de Oro.

Gibutyag ni Engr. Armen Cuenca, ulo sa City Local Environment and Natural Resources Office (Clenro), nga atol sa maong kalihokan, dunay nagbaligya og pan ug ilang nasapon nga nag-isyu og plastik.

"Didto sa rotunda, naay namaligya didto og bread nag issue og cellophane, P9,000 kay katulo man namo nasapnan," matud ni Cuenca.

Giingong ila kining gikumpronta ug ikatulo nasapon nga nag-isyu og plastik rason nga anaa sa P9 mil ang posibleng multa niini.

Gi-isyuhan usab kini og ordinance violation receipt sa tinugyanan sa Clenro.

Nasayran nga hugot ang kampanya sa lokal nga kagamhanan sa siyudad ilabi na sa Clenro diha sa pag dili sa paggamit og plastik ilabi na kini usa sa mga hinungdan sa pagbaha sa sentrong bahin sa siyudad.

Samtang gidugang usab ni Cuenca nga atol sa Higalaay Pyro Fest, ubay-ubay gihapon nga basura ang nahipos sa tinugyanan sa Clenro apan giingong dili kini mas daghan kumpara sa nilabay nga tuig.

"Daghan pa gihapon, pero at least dili pareha ka daghan last year," matud ni Cuenca.

Nanghinaot na lang usab kini nga unta magbaton ang tagsa-tagsa ka indibidwal og disiplina sa kaugalingon.

"Mao lagi, lisod ang behavioral change. Pero we still hoping in God's time," dugang niini.