TIKLO ang usa ka lalaki kinsa giingong nangawat og motorsiklo atol sa Biyernes Santo, Abril 19, alas 3:00 sa kaadlawon human nibangga sa usa ka patigayon sa Limketkai drive, Siyudad sa Cagayan de Oro.

Nagpaayo sa balay tambalanan si Mateo Alexis Acain, 20, ulitawo, walay trabaho ug residente sa Barangay 35 ning siyudad.

Sa nahipos nga impormasiyon gikan sa Police Station 2 (PS2) sa Cogon gikabutyag nga gisulayan pagdala ni Acain ang motorsiklo nga giparada lamang sa panimalay ni Roselyn Iglesia, 30, minyo, sidewalk vendor sa merkado sa Cogon ug residente sa maong dapit.

Giingong nasaksihan kini sa usa ka 14 anyos nga gikuha ni Acain ang motorsiklo nga Suzuki FD ug gimaneho palayo sa maong dapit.

Gidugang pa nga nabalitaan nalang usab ni Iglesia nga nabangga si Acain hinungdan sa pagkaangkon og mga samad sa nagkadaiyang parte sa kalawasan kinsa dali usab nga gidala sa Northern Mindanao Medical Center (NMMC) hinungdan sa pagkasikop.