GIPAMUGOS sa pamilya nga di kabalo mogamit og pistola ang namatay sa drug drug bust sa lungsod sa Tagoloan, Misamis Oriental.

Ang biktima nga giilang si Rolando Daapong, hingkod ang edad, residente sa Barangay Agusan, dakbayan sa Cagayan de Oro.

Napatay si Daapong sa mga operatiba gikan sa Provincial Drug Enforcement Unit (PDEU) didto sa lungsod sa Tagoloan dihang gikasa ang drug bust.

Giingong misukol kini sa kapolisan dihang namatikdan nga polis iyang katransaksyon.

Nakuhaan ang biktima og pito ka pakete sa gituohang shabu, lima ka empty shell sa armas nga kalibre 38 ug usa ka buhing bala niini.

Tulo sab ka samad naangkon sa biktima nga adunay mga patik sa kalawasan.

Ang amahan niini niasoy nga dili kabalo mogamit og armas iyang anak mao nga imposible sab alang kaniya nga misukol kini.

Hinuon aminado kini nga ang iyang anak adunay kalambigitan sa pagpayuhot sa ginadili nga druga.

Ang patay’ng lawas sa biktima gitakdang ihaya sa ilang puloy-anan sa Agusan karong panahona.