SUPORTADO sa Kongresista sa Misamis Occidental ang pagpagawas sa listahan sa mga politiko nga nalambigit sa ilegal nga druga, diin dunay upat ka ngalan sa mayor ang nalakip sa Northern Mindanao ilabi na sa Misamis Occidental sa ulahing gipagawas nga listahan.

Adunay 46 ka mga nalambigit sa ilegal nga druga ang anaa sa listahan ni President Rodrigo Duterte, diin 33 niini ang mayor ug upat ang sa Misamis Occidental, Northern Mindanao, walo ka bise mayor, 3 ka kongresista, 1 ka board member ug 1 ka kanhi mayor.

Sa pakighinabi kang Atty. Henry S. Oaminal, representante sa 2nd district sa Misamis Occidental, atol sa ikaduhang public hearing ug consultation sa basura nga gikan sa South Korea niadtong nilabay nga adlaw, gibutyag niini nga girespeto niini ang desisyon sa Presidente.

Giingong kini gikan usab sa nagkadaiyang intelligence community sa Presidente ilabi na sa Philippine Drug Enforcement Agency (PDEA), Philippine National Police (PNP), Armed Forces of the Philippines (AFP) ug lakip na usab sa National Intelligence Coordinating Agency (Nica).

“The pronouncement of the President which all of us because of the strong support that we have given to the President and even based on the latest survey, those are matters that should be addressed by local officials,” matud ni Oaminal.

Dugang niini nga suportado niini ang pakigbatok sa administrasyong Duterte sa ilegal nga druga, kriminalidad ug korapsiyon.

“I belong to legislative but we strongly support the war on drugs, the war on criminalities and the war on corruption of President Duterte,” dugang niini.

Nasayran nga posibleng dunay laing listahan ang gitakdang ipagawas na usab ni Duterte sa pipila ka mga adlaw.