USA ka Overseas Filipino Worker (OFW) gikan sa Saudi Arabia ang ika-upat nga kaso sa probinsiya sa Bukidnon human nigawas ang resulta sa ikaduhang swab test niadtong Hunyo 3, 2020 nga positibo siya sa coronavirus disease 2019 (Covid-19).

Kini mao ang ika-32 nga natalang kaso sa Northern Mindanao kinsa usa ka 35-anyos nga lalaki nga taga Don Carlos, Bukidnon.

Sa impormasiyon sa Provincial Health Office (PHO) sa Bukidnon, gikabutyag nga naabot kini sa Pilipinas niadtong Mayo 23, 2020 pinaagi sa direct flight.

Gi-swab dayon kini pag-abot sa Ninoy Aquino International Airport (NAIA) ug gi-kwarantinas sa usa sa mga hotel. Nagnegatibo ang resulta niini niadtong Mayo 26.

Nakabiyahe kini niadtong Mayo 29 sa flight nga Manila-Cagayan de Oro apan gumikan kay nagpositibo sa Covid-19 ang kauban nga repatriate gikan sa Saudi Arabia rason nga gikuhaan og swab sample niadtong Hunyo 1 ug nagpositibo kini sa nigawas nga resulta Miyerkules, Hunyo 3.

Gibutyag ni Dr. Lorraine Nery, officer-in-charge sa City Health Office (CHO) sa Cagayan de Oro, nga kini nga confirmed Covid-19 patient naka-stay pa sa usa sa mga hotel sa siyudad sa usa lang ka gabii.

"He was transported by a bus with 22 passengers and was placed in a hotel here in Cagayan de Oro," matud ni Nery.

Gikabutyag nga ang maong pasyente gihatod paingon sa Bukidnon pinaagi sa ambulansiya.

Padayon ang contact tracing ilabi na sa mga nakatagbo niini sa mga higayon sa pagbiyahe paingon sa dakbayan ug sa pagpundo sa siyudad sa mubong panahon.